POESIA DIALETTALE “EL CAMIN”

El caminEL CAMIN

El xe in meso a on stanson

fato de pièra, nero co fa el carbon,

el varda co i oci de fogo

el scolta co le rece del vento.

 

Cò el xe stuà, el tase

ma el spiòcia ‘te ogni canton.

Calumàndo l’òcia la casa

la zente che ciàcola e torno la va.

 

Inpissà el xe tuto na vanpa

el scalda, el ciàusca, el se desmissia.

i legni s’ciòca, i brusa su le bronse

i se crepa, i ròdola su la sénare.

 

Caro vecio camin!

Te vardo senpre co tenarèssa

scaldo el me core co le to fiame

che se rànpega sù par el buso nero.

 

Còntame fole de i dì passà,

de la me zente mai desmentegà

e in meso a i s’ciantisi del fogo

vedarò chi no xe pì co mi.

Mariarosa Cera

Lascia un commento

Il tuo indirizzo email non sarà pubblicato. I campi obbligatori sono contrassegnati *